Kvika banki hf.: Afkoma fyrstu sex mánuði ársins 2023Á stjórnarfundi þann 17. ágúst 2023 samþykktu stjórn og forstjóri árshlutauppgjör samstæðu Kviku banka hf. („Kvika“) fyrir tímabilið 1. janúar til 30.júní 2023.
Helstu atriði úr árshlutareikningi á fyrri árshelmingi 2023 - Hagnaður fyrir skatta nam 2.684 milljónum króna
- Arðsemi efnislegs eigin fjár fyrir skatta var 12,4%
- Hagnaður á hlut nam 0,4 kr. á tímabilinu
- Heildareignir námu 330 milljörðum króna
- Eigið fé samstæðunnar var 81 milljarðar króna
- Gjaldþolshlutfall fjármálasamsteypunnar var 1,24 og eiginfjárhlutfall samstæðunnar án tryggingastarfsemi (CAR) var 23,1%
- Heildar lausafjárþekjuhlutfall (LCR) samstæðunnar var 390%
- Heildareignir í stýringu námu 457 milljörðum króna
Kynningarfundur fyrir hluthafa og markaðsaðila verður haldinn kl. 16:15 fimmtudaginn 17. ágúst í höfuðstöðvum bankans, á 9. hæð í Katrínartúni 2, 105 Reykjavík. Fundinum verður jafnframt streymt á íslensku á eftirfarandi vefslóð: https://kvika.is/kynning-a-uppgjori-6m-2023/ Meðfylgjandi er fjárfestakynning. Að auki mun upptaka með enskum texta vera gerð aðgengileg á vefsvæði Kviku. Afkoma ágæt en áhrifa af erfiðum aðstæðum á fjármálamörkuðum gætir enn Hagnaður Kviku fyrir skatta á fyrstu sex mánuðum ársins 2023 nam 2.684 milljónum króna og arðsemi efnislegs eigin fjár (e. return on tangible equity) fyrir skatta var 12,4% á tímabilinu. Hreinar vaxtatekjur námu 4.347 milljónum króna og jukust um 27% miðað við sama tímabil árið áður og má aukningu vaxtatekna helst skýra með útlánavexti og hækkandi vaxtastigi sem eykur vaxtatekjur af skuldabréfaeignum. Vaxtatekjur útlána jukust um 423 milljónir króna á fjórðungnum en þrátt fyrir það lækkar hreinn vaxtamunur lítilega á milli fjórðunga því sterk lausafjárstaða og mikil hækkun vaxta á tímabilinu hafði tímabundið neikvæð áhrif á vaxtamun annars ársfjórðungs. Hrein virðisrýrnun nam 29 milljónum króna á tímabilinu samanborið við 96 milljónir króna á fyrstu sex mánuðum ársins 2022. Hreinar fjárfestingartekjur námu 436 milljónum króna. Hreinar þóknanatekjur námu 3.085 milljónum króna. Rekstrarkostnaður nam 5.713 milljón króna á fyrstu sex mánuðum ársins. Sterkur rekstur og iðgjaldaaukning í tryggingum
Tryggingarekstur TM gekk vel á tímabilinu og nam samsett hlutfall TM 97,5% á fyrri hluta ársins samanborið við 99,9% á sama tímabili árið á undan. Talsverð hækkun var á iðgjaldatekjum á tímabilinu sem jukust um 10,1% á sama tíma og tjónakostnaður hækkaði mun minna eða um 4,4%. Sterkur efnahagur og há lausafjárstaða Heildareignir jukust um 10% eða tæpa 31 milljarða króna á fyrstu sex mánuðum ársins 2023 og námu 330 milljörðum króna í lok júní. Útlán til viðskiptavina jukust um tæpa 12 milljarða króna á tímabilinu og námu 119 milljörðum króna í lok júní. Innstæður í bönkum og Seðlabanka ásamt ríkistryggðum verðbréfum námu 105 milljörðum króna en heildar lausafjáreignir voru 128 milljarðar króna og jukust um 11 milljarða króna á tímabilinu. Heildar lausafjárþekja (LCR) samstæðunnar án tryggingastarfsemi nam 390% í lok árshelmingsins sem var vel umfram 100% lágmarkskröfu eftirlitsaðila. Eigið fé samstæðunnar var 81 milljarður króna í lok tímabilsins. Gjaldþolshlutfall fjármálasamsteypunnar var 1,24 í lok árshelmingsins og áhættuvegið eiginfjárhlutfall samstæðunnar (CAR) án áhrifa TM nam 23,1%, en eiginfjárkrafa ásamt eiginfjáraukum eftirlitsaðila er 18,7%. Endurkaup hófust í júní 2023 Á tímabilinu 26. júní til 11. ágúst keypti bankinn 31.900.000 eigin hluti, sem samsvarar um það bil 0,7% af útgefnu hlutafé, fyrir um 550 milljónir. Kaup á eigin hlutum samkvæmt endurkaupaáætlun, sem samþykkt var af stjórn Kviku þann 23. júní 2023, munu að hámarki nema 1 milljarði króna. Afkomuspá hækkar um 200 milljónir Afkomuspá Kviku er nú sett fram fyrir grunnrekstur samstæðunnar, sem skilgreind er sem afkoma án fjárfestingatekna, í stað heildarafkomu. Afkomuspá, án fjárfestingatekna, gerir ráð fyrir 6,6 milljarða króna hagnaði fyrir skatta fyrir næstu tólf mánuði. Sambærileg spá sem birt var eftir fyrsta ársfjórðung hljóðaði upp á 6,4 milljarða króna, og er afkomuspáin því að hækka um 200 m.kr. Síðasta spá, með fjárfestingatekjum, hljóðaði upp á 9,4 milljarðar. Ef notuð væri sama framsetning og áður væri ný afkomuspá 9,6 milljarðar. Afkoma Kviku verður fyrir áhrifum af afkomu fjárfestingareigna í gegnum hreinar fjárfestingartekjur, en samhliða breyttri framsetningu eru í fjárfestakynningu veittar auknar upplýsingar um samsetningu eigna félagsins til þess að auðvelda markaðsaðilum að meta líklegar fjárfestingartekjur. Marinó Örn Tryggvason, forstjóri Kviku: „Kvika skilar ágætri afkomu á öðrum ársfjórðungi og kjarnastarfsemi heldur áfram að styrkjast. Rekstur viðskiptabanka, fyrirtækja og markaða og trygginga gekk vel á tímabilinu en eignastýring og fjárfestingastarfsemi litaðist talsvert af erfiðum aðstæðum á verðbréfamörkuðum. Ég tel uppgjörið vera vel ásættanlegt og að félagið eigi mikið inni. Á undanförnum árum hefur Kvika markvisst fjárfest í uppbyggingu félagsins með áherslu á fjártækni, nýsköpun í fjármálaþjónustu og öflugan mannauð. Stefna okkar er og hefur verið að umbreyta fjármálaþjónustu á Íslandi með gagnkvæman ávinning að leiðarljósi. Það er ánægjulegt að á undanförnum vikum hefur mikilvægum áföngum á þeirri vegferð okkar verið náð. Félagið tók stórt skref með útvíkkun þjónustu Aurs inn á einstaklingsmarkað með uppfærslu sem sett var í loftið á dögunum. Viðtökur viðskiptavina Aurs hafa verið langt umfram væntingar okkar en frá því að uppfært Aur app var sett í almenna dreifingu í lok júlí hafa verið gefin út yfir 9.000 ný greiðslukort og viðskiptavinir byrjaðir að notfæra sér nýja þjónustu. Með tilkomu nýrra lausna í Aur heldur Kvika áfram að auka samkeppni á íslenskum fjármálamarkaði. Á sama tíma hefur Straumur, greiðslumiðlunarfélag bankans, farið vel af stað en flutningar á söluaðilum frá Rapyd ganga vel og verður yfirfærslu á öllum söluaðilum lokið á seinni hluta ársins. Við höfum byggt góðan grunn að undanförnu og það eru því spennandi tímar framundan í fjártækni og nýsköpun í fjármálaþjónustu Kviku.“
|