Fly Play hf.: Bætt stundvísi og sætanýting á milli ára - Einingatekjur aukast enn
Flugfélagið PLAY flutti 98.863 farþega í desember 2024, borið saman við 114.265 farþega í desember árið 2023. Þetta endurspeglar 18% mun á framboði milli ára sem er bein afleiðing af ákvörðun PLAY að leigja eina af farþegaþotum sínum til GlobalX í Miami og aðlaga framboðið eftir árstíðabundnum sveiflum. Á móti kemur var sætanýtingin betri á milli ára, 78,9% í desember 2024 en 76,2% í desember 2023. Sætanýting PLAY á árinu 2024 var 85,3% samanborið við 83,4% á árinu 2023. PLAY hafði áður tilkynnt að félagið myndi leggja meiri áherslu á sólarlandaáfangastaði. Sú stefna hefur verið farin undanfarna mánuði og mun halda áfram árið 2025. Hlutur sólarlandaáfangastaða í leiðakerfi PLAY jókst úr 16% í desember árið 2023 upp í 22% í desember árið 2024. Sólarlandaáfangastaðirnir gefa af sér betri afkomu, en þar sem um er að ræða beint flug frá Íslandi þar sem tengifarþegar eru ekki fyrir hendi, kemur það jafnan niður á sætanýtingu, sér í lagi í kringum hátíðir. Þrátt fyrir það, varð aukning á milli ára á sætanýtingu í desember, sem endurspeglar aukna eftirspurn og að breytingar á leiðakerfinu hafi lagst vel í markaðinn.
Góð áhrif þessara breytinga má einnig sjá á einingatekjum félagsins sem hafa aukist á milli ára. Geta félagsins til að aðlaga sig að árstíðabundnum sveiflum í eftirspurn og færa sig yfir á markaði sem skila betri afkomu hafa haft jákvæð áhrif á fjárhagslega niðurstöðu. Desember var fjórði mánuðurinn í röð þar sem vöxtur hefur orðið á einingatekjum á milli ára og líkt og áður hefur verið greint frá eru horfur á að sú þróun haldi áfram árið 2025. Af þeim farþegum sem flugu með PLAY í desember voru 31,8% að ferðast frá Íslandi, 38,9% voru á leið til Íslands og 31,5% voru tengifarþegar (VIA). Þó dregið hafi verið úr framboði í desember þá jókst fjöldi íslenskra farþega á milli ára. 31 þúsund flugu með PLAY frá Íslandi í desember 2024, samanborið við 28 þúsund í desember 2023. Að sama skapi fjölgaði farþegum sem heimsóttu Ísland með PLAY, 34 þúsund í desember 2024 samanborið við 32 þúsund í desember í fyrra. Stundvísi PLAY í desember var 63,5%, samanborið við 59,0% í desember 2023. Desember mánuður er jafnan krefjandi í flugrekstri á Íslandi en til samanburðar má nefna að stundvísi PLAY fyrir allt árið 2024 var 87,5% en 83,2% allt árið 2023. Ferðum til sólarlandaáfangastaða fjölgað PLAY hefur bætt við áætlunarferðum til vinsælla sólarlandaáfangastaða árið 2025. PLAY verður með dagleg flug til Alicante á Spáni um páska og verður flogið fimm sinnum í viku frá lok maí til loka júlí. Að öðru leyti mun PLAY fljúga þrisvar í viku til Alicante. Ferðum til Madríd á Spáni verður fjölgað úr tveimur í þrjár á viku frá því snemma í ágúst til miðbiks september. Þá kynnir PLAY til leiks sumarferðir til eyjunnar Madeira, en hingað til hefur PLAY aðeins flogið til Madeira yfir vetrarmánuðina, frá september til maí. Einar Örn Ólafsson, forstjóri PLAY: „Það er afar ánægjulegt að sjá aukningu í farþegum sem ferðast með okkur frá Íslandi. Heimamarkaðurinn er okkur mikilvægur og við höldum áfram að vera fyrsta val Íslendinga sem vilja komast í sólina. Það er einnig gott að sjá aukningu í farþegum sem ferðast með okkur til Íslands, sem endurspeglar það mikla starf sem hefur verið unnið við að kynna PLAY sem traustan og góðan valkost fyrir erlenda ferðamenn. Stundvísi er afar mikilvæg í flugrekstri og fylgja henni margir kostir fyrir okkar rekstur. Mikil stundvísi eykur ánægju farþega okkar og hefur jákvæð áhrif á reksturinn. Að hafa náð 87,5% stundvísi árið 2024 er mikið afrek sem starfsmenn á flugrekstrarsviði og áhafnir okkar eiga allan heiður að. Við höfum bætt við ferðum til vinsælla sólarlandaáfangastaða sem hafa gefið góða niðurstöðu fyrir okkar rekstur. Ég er þess fullviss að aukin þjónusta til suðrænna áfangastaða muni hljóta góðar undirtektir hjá Íslendingum og þeim íbúum sem búa á þessum stöðum og vilja heimsækja Ísland.
|