Alþjóðlega lánshæfismatsfyrirtækið S&P Global Ratings (S&P) hefur í dag hækkað lánshæfismat Íslandsbanka í BBB+ og jafnframt staðfest A-2 skammtímaeinkunn bankans. Horfur eru stöðugar.
Að mati S&P hefur efnahagsleg áhætta (e. economic risk) sem íslensku bankarnir standa frammi fyrir dvínað samhliða auknum stöðugleika á húsnæðismarkaði og umtalsvert minni skuldsetningu einkageirans. Þá álítur S&P horfur á sértækri áhættu (e. industry risk) almennt stöðugar þar sem íslensku bankarnir eru arðsamir og vel fjármagnaðir sem gerir þá vel í stakk búna til að takast á við hugsanleg minnkandi eignagæði og verjast samkeppni erlendra banka og annarra fyrirtækja ef til þess kæmi.